San Ġorġ Preca u d-Devozzjoni lejn il-Madonna tal-Karmnu

Id-devozzjoni ta' San Ġorġ Preca lejn il-Madonna hi punt importanti ħafna fil-ħajja ta' dan il-qaddis Matli.  Il-vera devozzjoni lejn Marija Santissima hi karatteristika speċjali ta' kull qaddis.

“Qima qaddisa kollha aborriment lejn id-dnub, u kollha għożża lejn il-virtujiet, b’qima kostanti li ma tabbasanax l-eżerċizzi spritiwali, b’qima diżinteressata li tfittex ‘l Alla waħdu, ‘l Alla fl-Omm qaddisa tiegħu…”

Id-devozzjoni Marjana ta’ San Ġorġ iddur prinċipalment fuq tliet titli: ir-Rużarju, il-Labtu u l-Midalja Mirakoluża.

Ir-Rużarju

 San Ġorġ kien jemmen ħafna fir-rużarju u fil-protezzjoni li jġib fuq min jgħidu.  Kien isemmi l-każ ta’ oħtu Antonia, li mietet ta’ 30 sena f’April 1900 u li wara mewtha dehriltu u wrietu l-kuruna tar-Rużarju mdawra ma’ idha u qaltlu: “Ġorġ, din il-kuruna salvatni!”  Kien jenfasizza li r-Rużarju għandu jingħad sewwa u bla għaġġla, bil-meditazzjoni tal-misterui, billi hija talba kemm vokali kif ukoll mentali.  Lil Rakela Camilleri, superjura Għawdxija kitbilha: “Irrikmanda lil kulħadd li jgħidu kuljum ir-Rużarju għax, permezz tiegħu, il-Madonna bil-potenza tagħha qiegħda ssalva l-erwieħ.”

Huwa għamel regolament lis-soċji li jgħidu ħames posti kuljum, u ħmistax –il posta fil-festi ewlenin tal-Madonna.  Ta spiss kien itenni: “Il-Madonna sa nofs il-lejl tibqa tistenna biex insellmulha bir-Rużarju Mqaddes.”

 Il-Midalja Mirakoluża

 Id-devozzjoni lejn il-Midalja, li biż-żmien bidet tissejjaħ “Mirakoluża” għandha rabta ma’ Santa Katarina Laboure, soru tal-karita Franċiża.  Hi kellha xi dehriet mill-Madonna f’Pariġi.

 Il-mod kif dehritilha l-Madonna kien il-bidu tal-midalja ovali tal-Verġni Mbierka, bir-raġġI ħerġin minn idejha.  San Ġorġ emmen ħafna fil-qawwa tal-midalja mirakoluża.  Lil ħafna li marru għandu bi problemi, hu kien iqiegħdhom taħt il-ħarsien ta’ Marija billi jagħtihom midalja mirakoluża ħalli jbusuha.  L-għaxqa tiegħu kienet, li f’xi Sajda Museumina, wara li hu stess kien jitkellem dwar il-Midalja, jikteb fiha lill-folla preżenti, biex b’hekk il-Maltin kollha jkunu miktubin fid-Domna.

 Il-Labtu tal-Karmnu

Id-devozzjoni lejn il-Labtu tal-Madonna tal-Karmnu hija waħda mid-devozzjonijiet Marjani ewlenin ta’ San Ġorġ.  Jista jkun li din id-devozzjoni twieldet fih billi huwa twieled daqshekk qrib is-Santwarju tagħha fil-Belt Valletta u hu baqa jhares il-jum tagħha tas-16 ta’ Lulju.  Forsi wkoll billi kien dakinhar li fi tfulitu huwa kien se jegħreq taħt il-Barrakka t’Isfel u kien salvah Mikiel il-Barklor.

 San Ġorġ inkiteb terzjarju Karmelitan, bl-isem ta’ Patri Franco, f’Lulju 1919.  Huwa għamel obbligatorju għas-soċji tiegħu li jkunu miktubin u jġibu dejjem fuqhom il-labtu u ħalla miktub li dawk inkarigati mis-Sajdiet Musewmini għandhom iħabirku li jiktbu fil-Labtu tal-Karmnu lil dawk kollha li jieħdu sehem fis-Sajda.

 Kien iħobb itenni kliem il-Madonna, skond tradizzjoni antika, lil San Xmun Stock: “Min imut bih (il-Labtu) fuqu jinħeles mit-telfien ta’ dejjem…” u li : “Dawk kollha li jkunu mietu bil-Labtu tiegħi fuqhom, jiena fl-ewwel Sibt li jiġi fuq mewthom neħlishom mill-Purgatorju.”  (Karta Manwali).  Għal nhar is-16 ta’ Lulju, San Ġorġ għamel Programm Speċjail ta’ qima lil Marija u Programm ieħor tal-Virtujiet, il-Ħadd ta’ wara, għax il-veru labtu mhuwiex ħlief li nilbsu l-virtujiet ta’ Marija.

Tant xerred id-devozzjoni lejn il-Madonna tal-Karmnu li Patri Bernard Farrugia, provinċjal tal-Karmelitani, wara l-festi ċentinarji tas-700 sena tal-labtu, fl-1951, talab lill-Patri Kiljan Lynch, Ġeneral ta’ l-Ordni, biex jagħtih il-filjolanza spritwali mal-Karmelitani, bħala apprezzament.  L-istess Patri Provinċjal, sema min jgħidlu li l-Ordni Karmeltian għad ‘il quddiem jiċċelebra l-quddiesa f’ġieħ dan it-terzjarju, meta hu għad jiġi mgħolli għall-ġieħ ta’ l-altari.  U fil-fatt dan jista jseħħ, la darba San Ġorġ hu qaddis!

Estratt minn kontribuzzjoni ta’ Soċju tal- Museum li deheret fuq pubblikazzjoni tas-Soċjeta Karmelitana u Banda Queen Victoria, Żurrieq.

Ħajr lilhom tal-permess biex ninkluduha hawnhekk.